විවාහ ජීවිතයක් පටන් ගනිද්දී වියහියදම් ප්ලෑන් කරගන්නේ මෙහෙමයි – Hela FM Media

0
21


 

ප්‍රේමයෙන් බැඳුන ඕනෑම යුවලකගෙ ඊළඟ හීනෙ වෙන්නෙ කවදාහරි ලස්සන විවාහ උත්සවයක් අරගෙන තමන්ගේ ජීවිතේ ආදරණීයම කෙනත් එක්ක එක වහලක් යටට එන්නයි. එහෙම දෙන්නෙක් බාධක මැඩගෙන, ආදරේ දිනාගෙන එක වහලක් යටට එන්නෙ ආයෙ දුක සැප මොනව ආවත් ආදරේ වෙනස් නොවී තියාගන්න හිතාගෙන තමයි. හැබැයි එහෙම හිතන් ආවට කවුරුත් කැමති තමන්ගේ සහකරු හෝ සහකාරිය දුක අඩුවෙන් විඳලා සැප සහ සතුට වැඩිපුර විඳිනවටනෙ නේද? අන්න ඒ නිසයි විවාහ ජීවිතේදි තමන්ගෙ අයවැය හරි විදිහට කළමනාකරණය කරගන්න එක ඉතා වටින්නෙ.

ඉතින් අපි මේ කියන්න යන්නෙ අලුතින් විවාපත් උන අයටත්, විවාහ වෙන්න හිතාගෙන ඉන්න පෙම්වතුන් පෙම්වතියන්ටත් එකසේ වටින කරුණු ටිකක්. විවාහ ජීවිතේ මුල් කාලෙ තමන්ගෙ ආදායම් වියදම් ගාණට බැලන්ස් කරගෙන යන්නෙ කොහොමද කියල තමයි අපි ඔයාලට කියාදෙන්න යන්නෙ. එදිනෙදා ජීවිතේට සාර්ථකව මුහුණදෙන්න විතරක් නෙමෙයි අනාගතේ සැලසුමක් ඇතුව දියුණුවක් ලබන්නත් මේ කියන කරුණු කාරණා ඉවහල් වේවි.

 

1. එකමුතුව ආර්ථිකය සැලසුම් කරන්න
Source – atlantablackstar.com

මුදල් හදල් පාලනය සහ සැලසුම් තීරණ ක්‍රියාත්මක කරවන්නේ පවුලේ ස්වාමි පුරුෂයා වීම ඉස්සර ඉඳන් අපේ බොහොමයක් පවුල් වල තියන පුරුද්දක්. මේ කාර්යයට බිරිඳව හවුල් කරගැනීමක් සිදුවන්නේ නැහැ. බිරිඳට හුඟක් වෙලාවට කරන්න වෙන්නෙ ඔහුගෙන් ලැබෙන මුදල් වලින් ගේ දොර විය හියදම් බලාගෙන, කාල බීල ලස්සනට ඇඳපැළඳගෙන පැත්තකට වෙලා ඉන්නයි. නමුත් දැන් දැන් දෙදෙනාම රැකියා කරන පවුල් සංස්ථාවන් බිහිවීමත් එක්ක මේ තත්ත්වය ගොඩක් වෙනස් වෙලා තිබෙනවා. එසේ නොවුණත් දැන් ඒ වගේ පාරම්පරිකව ආපු පරණ තාලේ අදහස් වලට ආයුබොවන් කියන්න හොඳටම කාලෙ හරි.

රැකියාවක නිරත වන තැනැත්තියක් වුවත්, රැකියාවක නිරත නොවන ගෘහණියක් වුවත් බිරිඳ හා සැමියා යන දෙන්නාම එකතුවී පවුලේ ආර්ථිකය සැලසුම් කරන එක තමයි වඩාත්ම සාර්ථක වන්නේ කියල අපි සියල්ලටම කලින් මතක් කරන්න කැමතියි. මේ විදිහට දෙදෙනාම එකතුවී සැලසුම් කිරීමේදී නව අදහස් වැඩි ප්‍රමාණයක් සාකච්ඡාවට ගන්න පුලුවන් වීම ලොකු වාසියක්. ඒ වගේම සාමාන්‍යයෙන් එදිනෙදා භාවිතයට ගැණෙන භාණ්ඩ සහ සේවාවන් වල මිල ඉහල පහල යාම් ගැන වැඩි අවබෝධයක් බොහෝවිට තිබෙන්නේ බිරිඳටයි. මේ සියල්ලටම වඩා එක්ව තීරණ ගැනීම නිසා දෙදෙනාගේ එකමුතු බව, අවබෝධය සහ ආදරය උනත් වැඩෙන්න බලපානව කියලත් කියන්න ඕනෙ. පවුලේ දියුණුව උදෙසා දෙදෙනාටම එකම ඉලක්කයක් කරා කැපවී වැඩ කරන්නත් පුලුවන්කමත් මෙයින් ලැබෙනවා.

 

2. ආදායම් තත්ත්වය ගැන විමසන්න
Budgeting tips
Source – movoto.com

සමහර පවුල් වල සැමියයි බිරිඳයි දෙන්නම රැකියා කරනව. තවත් පවුලක සැමියා හෝ බිරිඳ විතරක් රැකියාවක හෝ ව්‍යාපාරයක නිරත වෙනව වෙන්න පුලුවන්. මේකෙන් කොයි ආකාරෙ උනත් මුලින්ම කරන්න ඕනෙ තමන් පවුලක් හැටියට මාසිකව උපයන මුදල ගැන අදහසක් ගන්න එකයි. මාසික වැටුප් හෝ තමන් ජීවනෝපාය සඳහා කරන ව්‍යාපාරයකින් එන ආදායම් මුලින් ගණන් බලන්න. ඊට අමතරව බැංකු පොලී සහ වෙනත් ආදායම් එහෙම තියනවනම් ඒ ගණනුත් මේකට එකතු කරගන්න. මේ ගණන ලක්ෂ දෙක තුනක් උනත් රුපියල් හත් අට දහක් උනත් කාරියක් නෑ. තමන් ඉදිරි ජීවිතේ සැලසුම් කරගන්න මේ මුදල ගැන අවබෝධයකට එන එකයි මුලින් වැදගත් වෙන්නෙ..

 

3. වියදම් ගැන බලන්න
Budgeting tips
Source – wisegeek.com

ඊළගට කරන්න ඕනෙ දේ තමයි මාසිකව දෙදෙනාට වැය වෙන්න පුලුවන් වියදම් ගැන දළ අදහසක් ගන්න එක. මේකට ඉතින් අනිවාර්යෙන් තමන්ගෙ වියදම් සටහන් කරගෙන ඉන්න වෙනවා. ගෙදරට ගේන ගිණි පෙට්ටියේ ඉඳන් බිල්පත් ගෙවීම් දක්වා මුදලක් වියදම් වෙන හැම දෙයක්ම දවස අවසානෙ සටහන් කරගෙන ඉන්න එක වැදගත් වෙනවා. මේ විදිහට සටහන් කිරීමෙන් මාසයක් දෙකක් ඇතුලතදි තමන්ගේ සාමාන්‍ය මාසික වියදම ගැන අදහසක් ගන්න ඔයාලට පුලුවන් වේවි.

දැන් මේ මාසික දළ වියදම් වලට අමතරව තවත් අවධානයට යොමු කරන්න ඕනෙ දෙයක් තියනවා. ඒ තමයි තමන් උපයන මුදලින් කැපිල යන වෙනත් වියදම් එහෙම තියනවද කියල. උදාහරණෙකට කිවුවොත් අධ්‍යාපන කටයුත්තකට ගත් ණයක් හරි වෙනත් මිලදීගැනීමක් කල නිසා මාසිකව ගෙවන්නට වෙන මුදලක් හරි තියනවනම් ඒවත් මේ වියදම් ගොඩට දාගන්න එක වටිනවා.



 

4. ආදායමට වඩා වියදම වැඩිද?
Budgeting tips
Source – phillipsfamilylaw.com.au

ගණන් හිලවු හදලා ජීවත් උනත් මාසෙ අන්තිමට උපයන මුදලට වඩා මුදල් වියදම් වෙනවා කියල කෙනෙක්ට හිතෙන්න පුලුවන්. මේ කාරණේදි තමයි අපි කලින් කියපු වියහියදම් සටහන් කිරීම ප්‍රයෝජනේට එන්නෙ. මේ වගේ වෙලාවකට මුලින්ම මේ වියදම් ලයිස්තුව පිරික්සලා අනවශ්‍ය දේවල් හැටියට කපා හරින්න පුලුවන් වියදම් මොනවද කියල බලන එකයි කරන්න ඕනෙ. මෙහෙම පරික්ෂා කරද්දි බොහෝ විට එහෙම දේවල් ඔබට අහුවෙන්න පුලුවන්. අනවශ්‍ය ප්‍රමාණවලින් ගත්ත ආහාර ද්‍රව්‍ය, නිතර නිතර සිදුවුණ ත්‍රී රෝද රථ වියදම්, හදිසිය නිසා වැඩි මුදලක් ගෙවා මිලදී ගත්ත භාණ්ඩ සහ සේවාවන් වගේ සැඟවුණු අනවශ්‍ය මුදල් නාස්ති පෙනෙන්න පුලුවන්. එහෙමත් නැත්නම් විදුලි බිල, ජල බිල්පත් වගේ ගාස්තු තව අඩු කරගන්න ක්‍රමවේද යොදන්න පුලුවන් කියල හිතෙන්න පුලුවන්. මේ වියදම් අඩු කිරීම මගින් කොතරම් සහනයක් ගන්න පුලුවන්ද කියල බලන එක තමයි මුලින්ම කරන්න අවශ්‍ය.

දෙවනුව හිතන්න ඕනෙ තමන්ගේ වර්තමාන ආදායම් තත්ත්වය වැඩි කරගන්න ගන්න පුලුවන් පියවර මොනවද කියල. තමන් කරන රැකියාවෙන් දියුණුවක් ලබන්න, තමන්ගේ ඉපැයීම් නියමිත ආකාරයෙන් කළමනාකරණය කරගන්න වගේම අමතර මුදලක් උපයාගන්නත් ඔබට රුකුලක් වෙන ලිපි බොහොමයක් අනිවා අපි තිළිණ කරල තියන නිසා ඒ වැඩේ අමාරු වෙන එකක් නෑ.

 

5. බජට් එකට හුරු වෙන්න
Budgeting tips
Source – thrifthq.com

තමන්ට සාමාන්‍යයෙන් මාසිකව යන වියදම ගැන අදහසකට ආවට සහ ඒ වියදම් සහ ආදායම් බැලන්ස් කරන විදිහ දැන ගත්තට විතරක්ම නම් මදි. අනිවාර්යෙන්ම තමන්ගෙ මාසික වියදම් තබාගතයුතු සීමාව ගැන දැනගෙන ඒ සීමාව ඉක්මවන්න දෙන්නෙ නැතිව පවත්වාගෙන යන එක තමයි අමාරුම කාර්යය. දැන් මේ සීමාව පණවගනිද්දි ඕනෑවට වඩා අඩු මුදලක් තියාගෙන පටි තදකරගෙන ජීවත් වෙලා මානසිකව දුකට පත්වෙන්න යන්න එපා. තමන්ට සාමාන්‍යයෙන් මාසිකව යන වියදම් ප්‍රමාණය සහ තව හදිසි අවශ්‍යතාවයක් උනොත් වියදම් වේවිය කියලා හිතෙන අමතර මුදලක් එකතුවෙන් මාසික වියදම් සීමාව තීරණය කරන්න (උදා- මාසික සාමාන්‍ය වියදම රු. 50,000+අනපේක්ෂිත වියදම් සඳහා රු.5000= වියදම් සීමාව රු. 55,000). නොකරම බැරි, හදිසි වියදමක් ආවොත් මිසක කොයියම්ම වෙලාවකවත් මේ සීමාව ඉක්මවා නොයන්න මතක තියාගන්න. ඒ වගේම තමයි මාසෙ අන්තිමට තමන් මේ වියදමට වඩා අඩුවෙන් වියදම් කරල ඉතිරියක් කලොත් ජොලිය වැඩි කමට ඒ ඉතිරි මුදලෙම පීසා කන්න යන්න එපා. කොටසක් හෝ නැවත ඉතිරි කරන්න. එහෙම නැත්නම් ඒක ඊළඟ මාසයේ වියදමට වෙන්කරන මුදලට එකතු කරන්න මතක තියාගන්න.

 

6. දිගුකාලීන සහ කෙටි කාලීන සැලසුම්
Budgeting tips
Source – animationguildblog.blogspot.com

අපි කාටත් බලාපොරොත්තු සහ හීන තියනවා. ඒවා හඹායාම තමයි බොහෝවිට අපේ ජීවිත වලට සතුටක් ගෙන දෙන්නේ. විවාහ ජීවිතේදිත් මුදල් වලින් ඔබට සපුරා ගන්න හීන ගොඩක් ඇති. සල්ලි ටිකක් වැඩිපුර ඉතිරි කරන්න, කාර් එකක් ගන්න, කුලී ගෙදරට බායි කියල තමන්ගෙම ගේකට යන්න වගේ ගොඩක් දේවල් කරන්න හිතාගෙන ඇති. අන්න ඒ දේවල් ගැන තමයි ඊළඟට අවදානය යොමු කරන්න ඕනෙ. මේ දේවල් සැලසුම් කිරීම තනි තනියෙන් නෙමෙයි, සැමියා සහ බිරිඳ දෙන්න එකතුවෙලා සාකච්ඡා කරල සහයෝගෙන් එකමුතුවෙන් කරන්න මතක තියාගන්න.

අපි කලින් කිවුවනෙ ආදායමට වඩා වියදම අඩු කරගන්න පියවර ගන්නය කියල. විවාහ ජීවිතේ මුදල් කළමනාකරණය කරද්දි මුලින්ම කරන්න ඕනෙ දේ තමයි ඒක. ඊළඟ බලන්න ඕනෙ ණය තුරුස් වගේ දේවල් තියනවනම් ඒ දේවල් වලින් කාලයත් එක්ක නිදහස් වෙන්න ගන්න ඕනෙ පියවර මොනවද කියලයි. ක්‍රෙඩිට් කාඩ් ණයකින් ගොඩ එන්නේ කොහොමද ලිපියෙන් මේ ගැන උපදෙස් ගොඩක් අපි ලබාදුන්නා. ඔබ වෙනත් ණය බරකින් තැලිල ඉන්නව උනත් ඒ ලිපියේ ඇති කරුණු බොහොමයක් ඔබට එයින් ගොඩ එන්න උපකාරී වෙන්න පුලුවන්.

ඉතිරි කිරීමට සැලසුමක් ගහන එකත්, ඒ ඉතුරුම් එක්ක තමන්ගේ ජීවිතේ ඉදිරි සැලසුම් සාර්ථක කරගන්න එකටත් තමයි ඊළඟට අවදානය යොමු කරන්න අවශ්‍ය. තමන්ගේ පවුල් ජීවිතයේ සන්තෝෂයට සහ යහ පැවැත්මට මුලින්ම වඩාත්ම වැදගත් වන්නේ මොන දේ ලබාගැනීමද කියල තීරණය කරල ඒ දේට ප්‍රමුඛත්වය දීල වැඩ කරන එක තමයි වැදගත් වෙන්නේ. කෙටි කාලීන සැලසුම් හැටියට යම් කාල පරිච්ඡේදයක් ඇතුලත යම් කිසි මුදලක් ඉතිරි කරන්න ඉලක්ක කරන්නට පුලුවන්. ඒවායේ සාර්ථකත්වය අනුව ඉදිරි ආයෝජන, ඉඩම්, නිවාස සහ මෝටර් රථ මිලදී ගැනීම් වැනි දීර්ඝ කාලීන සැලසුම් ක්‍රියාත්මක කරවන්න පුලුවන්.

 

7. තම තමන්ගේ වියදම් ගැනත් දෙන්නම හිතන්න වෙනවා
Budgeting tips
Source – vashikaranspecialist.biz

සමහර වෙලාවට කොච්චර ඉතුරු කරන්න හිතන් හිටියත් ඉතිරියක් වෙන්නෙම නෑ. ලබන මාසෙ ඉඳන් ඉතිරි කරනවා කියල හිතාගෙන අන්තිමේ අවුරුදු ගණන් පවුල් කාලත් කරගත්ත ඉතිරියක් නැති වෙනවා. සමහර වෙලාවට මේ දේවල් වෙන්නෙ ඔයාල දෙන්නගෙ යම් යම් වියදම් කිරීමේ පුරුදු වෙන්න පුලුවන්. උදාහරණෙකට කිවුවොත් බිරිඳ ඇඳුම් විලාසිතා වලට, ආභරණ වලට එහෙම මුදල් වැඩිපුර වියදම් කිරීමේ නැඹුරුතාවයක් තියෙන්න පුලුවන්. සැමියා නම් යාලුවො එක්ක සති අන්තවල සෙට් වෙන්න එහෙම ලොකු වියදමක් කරනව වෙන්න පුලුවන්. මේ වගේ දේවල් ගැන දෙන්න එක්කම සාකච්ඡා කරල ඒ වියදම් අඳුනගෙන පිළියම් යොදන්න හිතාගන්න ඕනෙ. එකිනෙකාට දොස් පවරගන්නවත් වරද පටවන්න යන්නෙවත් නැතිව අනවශ්‍ය තරමට වියදම් රැස් කෙරෙන පුරුදු තියනවනම් ඒ දේවල් තේරුම් අරන් අවම කරගන්න එක වටිනවා. ඇඳුම් පැළඳුම් නොගෙන ඉන්නවත්, යාලු මිත්‍ර ආශ්‍රය නවත්වන්නවත් නෙමෙයි අපි කියන්නේ. ඒ දේවල් සීමාව ඉක්මවා යනවනම් සීමාවක් ඇතුලට ගන්න කියලයි.

 

8. හදිස්සියකට ගන්න මුදලක් ඉතිරි කරගන්න එක අනිවා!
Budgeting tips
Source – discountdisney.wordpress.com

කාර් බාර් ගන්නවත්, ගෙවල් දොරවල් හදන්නවත් කලින් අනිවා කරන්න හිතාගන්න ඕනෙ දෙයක් තමයි මේක. ඒ තමයි හදිස්සි කරදරේකදි කියලා ප්‍රයෝජනයට ගන්න පුලුවන් මුදලක් ඉතිරි කරන එක. මේ ඉතුරුම් මුදල සාමාන්‍යයෙන් ඔබේ පවුලේ මාසික වියදම වගේ හය ගුණයක් වත් කරගන්න පුලුවන්නම් වඩා හොඳයි. මොකද කරදර එන්නෙ කිය කිය නෙමෙයිනේ. ලෙඩ දුක්, රැකියා අහිමිවීම්, හදිසි අලාභ වගේ දේවල් නිසා ඔබේ ආර්ථිකය දෙදරන්න නොදී තියාගන්න මේ ඉතුරුම් මුදල වටිනවා.

ඒ වගේම තමයි මගුල් ගෙවල්, පාටි වාටි, ට්‍රිප් යැවිලි සහ චැරිටි වැඩ වගේ ඔබේ මාසික වියදමට අමතරව ඉඳහිට වැටෙන්න පුලුවන් වියදම් තියනවා. මේ දේවල් වලින් ඔබේ ආර්ථිකයට ලොකු හානියක් නොවෙන්නට නම් ඒ දේවල් ආවරණය වෙන්නත් වෙනම මුදලක් ඉතිරි කරන්න උත්සාහ කරන්න.

 

9. බැංකු ගිණුම් එකලාසයක් කරගන්න
Budgeting tips
Source – youtube.com

විවාහ ජීවිතේ පටන් ගනිද්දි ඔබ දෙපල සතුව තියෙන බැංකු ගිණුම් එකලාසයක් කරගැනීමත් ඉතා වටිනවා. ඉතුරුම් ගිණුම් එහෙම තියනවනම් ඒ ගිණුම් එකතු කොට හවුල් ගිණුමක් බවට පත් කරන්නට පුලුවන්. එහෙමත් නැත්නම් මාසික ආදායමක් හැටියට අමතර පොලියක් ලැබෙන්න කියල ස්ථාවර තැන්පතුවක් බවට පත් කරන්න පුලුවන්. මේක ඉතින් දෙන්නාගේම කැමැත්තෙන් සහ එකඟතාවයෙන් කල යුතු දෙයක්. රැකියාවෙන් හෝ ව්‍යාපාරයකින් උපයන මුදල මාස්පතා විය හියදම් පියවගෙන පහසුවෙන් ජීවත්වෙන්න ප්‍රමාණවත් නම් මේ බැංකු ගිණුම් වලට අත නොතබා අනාගත අයෝජනයකට හෝ හදිස්සි අවස්ථාවක ප්‍රයෝජනයට ගතහැකි මුදලක් හැටියට වැඩෙන්නට දෙන එක තමයි වඩා හොඳ.

 

10. ඉතිරි කරන්න අමාරු නම් මේ ක්‍රමෙත් බලන්න
Budgeting tips
Source – listenmoneymatters.com

දැන් අපි අරකට ඉතිරි කරන්න, මේකට ඉතිරි කරන්න කියල කීප තැනකම කිවුවනෙ. එහෙම කිවුවට ඒ කියන විදිහට ඉතිරි කරන එක හිතන තරම් ලේසි කාර්යයක් නෙමේ. ඒක අපි දන්නවා. ඒ නිසා ඒ සඳහා අනුගමනය කරන්න පුලුවන් එක පිළියමක් අපි කියන්නම්. මේක හුඟක් වෙලාවට ආදායම සහ වියදම අමාරුවෙන් බැලන්ස් කරගෙන යන පවුලකට වැදගත් වේවි.

මෙහෙමයි කරන්නෙ, මුලින්ම තමන්ට මාසිකව යන වියදම් කැටගරි වලට වෙන් කරන්න. කෑමබීම, බිල් ගෙවීම්, ගමන් බිමන්, විනෝදය වගේ දේවල් වලට. ඊට පස්සෙ මේ දේවල් වලට මාසිකව සාමාන්‍යයෙන් යන වියදම ගණනය කරල ඒ ඒ වියදමට සරිලන මුදල් වෙන වෙනම ලියුම් කවර වලට දාල වියදමේ නම ලියන්න. ඉන් පස්සේ කරන්න තියෙන්නෙ මේ වියදම් එන විදිහට අදාල ලියුම් කවරෙන් මුදල් අරන් ගෙවන එකයි.

දැන් බලනව ඇති මොකක්ද ඉතින් මේකෙ වෙනස කියල. කොහොම ගියත් සල්ලිනෙ වියදම් වෙන්නෙ කියල හිතනව ඇති නේද? නෑ. මේකෙන් පොඩි වාසියක් වෙනව. සාමාන්‍යයෙන් අපි කාඩ්පතකින් මුදල් ගෙවද්දි ඒ මුදල් අපේ ඇහැට පේන්නෙ නෑ. මුදල් ක්ෂය වෙනව අපිට දැනෙනව අඩුයි. ඒ නිසා සමහර විට මාසික වියදම් වල ලිමිට් පැන්නත් කාඩ් එකේ සල්ලි තියනකම් ඔහේ වියදම් කරගෙන යන්න අපි පෙළඹෙනව. නමුත් ලියුම් කවරෙක දාල තියන මුදල් ටික ටික අඩු වෙනව දකිද්දි ඉබේම මුදල් සකසුරුවම්ව පාලනය කරන්න අපිව පෙළඹෙනව. අන්න ඒ නිසයි මුදල් ඉතුරු කරන්න හිතන් ඉන්න ඔයාලට මේ ක්‍රමේ වාසියක් හිටින්නෙ.

 

11. නවීන තාක්ෂණෙනුත් වැඩක් ගන්න

පවුලේ විය හියදම් සටහන් කරගෙන, කාලෙන් කාලෙට ඒවා පරික්ෂා කරල බලන එකේ වැදගත්කම අපි කිවුවනෙ. මේ වැඩේ කරන්න සාමාන්‍යයෙන් යොදා ගන්න ක්‍රමය තමයි ලොග් පොතක මේ ගණන් හිලවු සටහන් කරගන්න එක. මේ ක්‍රමේ වරදක් නැති උනාට දැන් ඉතින් අලුත් තාක්ෂණික ඇප්ස් එහෙම ඇවිත් තියන නිසා පොත් පෙරළ පෙරළ ඉන්නෙ නැතිව දෙන්නා අතර ඒ දේවල් ෂෙයා කරගෙන ආර්ථිකේ සැලසුම් කරන්න පුලුවන් කම තියනවා. එහෙම කීපයක් ගැන තමයි මේ කියන්න යන්නෙ.

 

Mint

Budgeting tips
Source – greatsiteslike.com

මේකෙ තියන සමහරක් විශේෂාංග ලංකාවෙ අපිට උපයෝගී කරගන්න බැරි උණත් තමන්ගෙ මාසික සහ වාර්ෂික වියදම් සහ ආදායම් සටහන් කරගන්න යොදාගන්න පුලුවන් හොඳ ඔන්ලයින් බජටින් ටූල් එකක් මේක. මාසික විය හියදම් සසඳල බලන ගමන්ම අනාගත ආර්ථික ඉලක්ක සැලසුම් කරගන්නත් මින්ට් භාවිතාවෙන් ඔබට පුලුවන්.

 

Budgetpulse

Budgeting tips
Source – budgetpulse.com

බජට් පල්ස් කියන්නෙත් මින්ට් වගේම ඔබේ අයවැය පාලනය කරගන්න යොදාගන්න පුලුවන් මෘදුකාංගයක්. තමන්ගේ මාසික අයවැය සටහන් කරගෙන ඔබේ වියදම් ගැන අවබෝධයක් ලබාගන්නත්. ඔබේ අය වැය දැක්වෙන රේඛා සටහන් සහ වගු නිතර නිතර පරික්ෂාවට ලක් කරල තමන්ගේ පවුලේ ආර්ථිකය ගැන අවබෝධයක් ලබන්නත් පුලුවන්.

 

ExpenseIQ

Budgeting tips
Source – expense-iq.com

ඔබේ මුදල් ගැන, දිනපතා වියහියදම් ගැන සහ ගෙවිය යුතු බිල්පත් ආදිය ගැන සටහන් තබාගන්න කදිම ඇප් එකක් තමයි මේක. මේ මගින් ඔබේ වියදම් ගැන දළ විශ්ලේෂණ වාර්තා ලබාගන්නටත්. ඒවා පරික්ෂා කිරීමෙන් තමන්ගේ අයවැය පාලනයේ අඩුපාඩු විමසලා නිවැරදි කරගන්නටත් පුලුවන් වේවි.

මීට අමතරව ගූගල් ෂීට් එකක් යොදාගෙනත් ඔබ දෙදෙනාට පවුලේ අයවැය සකසන්න හැකියාවක් තිබෙනවා.

 

12. සාකච්ඡා කරන්න, අත්හදා බලන්න
Budgeting tips
Source – splitwise.com

අඩුම තරමේ මාස තුනකට වතාවක්වත් විය හියදම් ගැන දෙන්නා එක්ක පොඩි සාකච්ඡාවක් දාන්න. තමන් තමන්ගෙ සැලසුම් වලට අනුව ජීවිතේ ගෙනියනවද? ඒවට ඇවිත් තියන බාධාවන් මොනවද කියන දේවල් ගැන දැනුවත් වෙන්න. සාමාන්‍යයෙන් මාස්පතා මොනවාම හරි අත්‍යවශ්‍ය භාණ්ඩයක හරි සේවාවක හරි මිල ඉහල යන එක සාමාන්‍යය කාරණයක්. ඒ දේවල් තමන්ගෙ මාසික වියදම් වලට බලපාන හැටි සහ ඒවායේ බලපෑම අවම කරගන්න ගන්න පුලුවන් පියවර ගැන සාකච්ඡා කරන්න.

ඒ වගේම තමයි තමන් නිතර ලබා ගන්න භාණ්ඩ සහ සේවාවන් එක්ක පොඩි පොඩි අත්හදාබැලීමක්, ඩිටෙක්ටිව් වැඩක් එහෙම කරන්න බලන්න. ෆුඩ් සිටි එකක් වෙනුවට තොග කඩේකින් බඩු ටිකක් අරන් බලන්න, භාණ්ඩ කීපයක් මාරුවෙන් මාරුවට අත්හදා බලල වැඩි පිරිමැස්මක් සහ ඉතිරියක් තියන දේවල් හඳුනාගන්න උත්සාහ කරන්න, මාසෙකට ගෙදර අවන් එක පාචිච්චි වෙන වාර ගණන කාලය ගණනය කරල ඉන් විදුලි බිලට වෙන වෙනස ගැන අවබෝධයක් ලබාගන්න. මේ වගේ පොඩි පොඩි පර්යේෂණ කාලයත් එක්ක කරල බැලුවොත් නොදැනීම පවුල් ආර්ථිකය ගැන විශේෂඥ දැනුමක් ලබාගන්න පුලුවන් වේවි.

 

 


 
Cover Image Source – huffingtonpost.com
 



LEAVE A REPLY

Please enter your comment!
Please enter your name here